الخميس، 30 أبريل 2015

يوميات فوركساوى الجزء التانى


بسم الله الرحمن الرحيم

 الفكرة :
 ابتدى مشوار الفوركس معايا من 2008 عن طريق شركه انا مش فاكر بالضبط عرفتها ازاى (مش هقول اسامى زى ما اتفقنا) المهم , قدموا لى دعوه فى القاهره -وانا اسكندرانى اساسا - لسيمنار فى احد الفنادق ال 5 نجوم فى القاهرة ، رحت فلقيت ناس كلها كبيره -وانا عمرى وقتها 24 سنه - كلمونى عن بورصه وعملات و بزنس و فلوس كتير بالاف الدولارات وانا قاعد متنح لانى اساسا باخد مصروفى من بابا ف إزاى ادخل موضوع زى ده وكمان بالدولار اللى هو عمرى ما مسكته !!!!

طبعا سمعت الكلام و طنشت و رجعت اسكندريه وكان مكسبى الوحيد من السفر ده هو العشاء فى البوفيه ههههه

شفت حياتى بعدها واتخرجت واشتغلت و سافرت السعوديه و قامت الثورة فى 2011 و اضطررت للرجوع لاسباب شخصيه و اشتغلت فى مصر تانى  - كل ده وانا مفيش فى دماغى حاجه اسمها فوركس - لكن مره وفى احدى مقابلاتى مع عميل فى شركة للمقاولات ف وهو بيحكى معايا فقالى ده انا بشتغل مقاولات و بشغل فلوسى من الفوركس 

ساعتها فيه لمبه نورت فى دماغى كده زى بتاعه عبقرينو 
- فوركس !!!! ده الموضوع طلع بجد 
ابتديت ساعتها انى اتابع موضوع الفوركس ده واشوف ايه الحوار ده ( وخصوصا ان ربنا كان رازقنى بشويه فلوس)

طب اسال ميين وفين و البلد كلها مفيش على لسانها حاجه غير السياسه ( اصلى نسيت اقولكم ان دلوقتى احنا فى 2012 )
بقيت اشوف اعلانات على النت و طبعا عارفين شغل الاعلانات لما يحسسوك انك هتبقى مليونير  فى ظرف سنه !!! طبعا الكلام ده مايكلش معايا لانى فاهم مش ولد صغير هيضحك عليا 

طب وبعدين ؟!
ابتديت اسال الناس على النت و صحابى و طبعا سمعت العجب
- الفوركس لالالالالا ده نصب 
- يابنى ابعد عنه ده محرقه فلوس
- دى اشتغاله و مفيش حاجه اسمها فوركس !!
-ده انت هتتسحل قدام امام الشاشه و يومك هيبوظ ومش هتنام
بس طبعا الاغلب بيقول انه نصب وخصوصا انه مش مترخص فى مصر 

بعد مناقشات مع اصحاب الكلام ده لاحظت حاجه مهمه اوى ان الناس دى يا واحد مش فاهم  وبيفتى وخلاص او واحد مجربش ومشى على كلام الناس او واحد دخل وفشل وخسر فلوسه او واحد جرب كام شهر (وفيه ناس محصلتش شهر) او واحد اساسا اعطى فلوسه لواحد و اتضحك عليه !!!

- لا ده الموضوع محتاج فلترة عشان نعرف الحقيقه فين 
مبدئيا هو مش اشتغاله لأن مش معقول يعنى ان محافظين النوك المركزيه و البيانات الاقتصاديه و قنوات زى بلومبرج و cnbc العربيه والهيلمان الكبير ده ويبقى اشتغاله 

ابتديت اتابع مواقع اجنبيه وعربيه للتحليل (مش بتوع ادارة المحافظ ) لقيت ان فيه ناس ناجحه و بتعمل فلوس لكن الناس دى (الا القليل) يا تلاقيه كده فى حاله ومش بيوجع دماغه انه يعلم و يفيد غيره او بيخاف من الحسد فمش عايز يقول انه بيكسب كويس او يادوب يكتب له status او تحليل على الفيسبوك عام كده مايديش عقاد نافع عشان يخلى مسئوليته !!

فضل فى دماغى سؤالين :
  1. ازاى اشتغل وانجح زى الناس دى ؟
  2. والسؤال الأهم ايه اللى يضمن لى ان الشركه اللى هشتغل معايا ماتنصبش عليا و لو نصبت اشتكى لمين ؟؟!!
فقررت انى اخوض تجربتى بنفسى وانتقل من مرحله الكلام و السمع الى مرحله العمل
 يتبع

كاتب الموضوع : مصطفى عنبر
تابعونى على الفايسبوك  

0 التعليقات:

إرسال تعليق